Kua puta ngā raraunga o Ngā Mōhiohio Paetae Tūmatanui (PAI) 2016

Ka whai tirohanga tātau i te PAI mō te āhua o te tautoko a te pūnaha mātauranga i ngā paetae ākonga. Kei roto i ngā raraunga ko ngā tatau whai wāhi atu o mua ki roto i te mātauranga kōhungahunga, me ngā paetae i roto i Ngā Paerewa ā-Motu, Ngā Whanaketanga Rumaki me te NCEA.

I te tau 2016 i piki haere te maha o ngā ākonga e wehe ana i te kura me te whai tohu. Tata ki te 85% o ngā ākonga 18 ngā tau i whiwhi i te NCEA Taumata 2 i tērā tau, ā, kei te whāiti haere ngā wehenga i waenga i ngā ākonga Māori me ō Te Moananui-a-Kiwa me te tau toharite ā-motu, e nui haere ai ngā whai wāhitanga me te whakapai ake i ngā putanga oranga mō ā tātau taiohi.

Kei te whakamahia anō e ngā kura ngā ara ahumahinga e nui atu ai ngā ākonga e āwhinatia ana kia puta i ngā ara whaikiko ki te mātauranga tuatoru me te whai mahi. Ko te ōwehenga o ngā ākonga e whiwhi ana i Ngā Tohu Ara Ahumahinga i piki mai i te 27.2% i te 2013 ki te 32.9% i te 2016.

E mōhio ana mātau ko te tīmatatanga pai rawa mō te mātauranga o ngā tamariki ko te uru ki ngā mātauranga kōhungahunga whai kounga. Nā te aro nui ki te whakapiki i te whai wāhitanga ki te mātauranga kōhungahunga i tino piki rawa atu te tatau o ngā mātua e whakauru ana i ā rātau tamariki ki tētahi ratonga mātauranga kōhungahunga, ā, tata ki te 97% o ngā kōhungahunga e uru ana ki te mātauranga kōhungahunga i mua i te tīmatanga i te kura.

Kei te neke ō mātau kaha ināianei ki te hāpai i te paetae o ngā tamariki katoa i roto i te pāngarau me te tuhituhi. Ka whakarato Ngā Paerewa ā-Motu me Ngā Whanaketanga Rumaki Māori i ngā mōhiohio pai ake ki ngā kaiako, ngā kaiārahi kura me ngā mātua mō aua tamariki me whai āwhina tāpiri. Mā te whiwhi i Ngā Paerewa ā-Motu mō te pānui, tuhituhi me te pāngarau ka tae mōhio tonu atu ngā ākonga ki te kura tuarua ki te kōkiri haere i ā rātau akoranga. Engari kāore i te anga whakamua te paetae i ia tau ki te tatau e hiahiatia ana e mātau. Koirā i whakatakotohia ai e mātau tētahi whāinga hou o te 80% o ngā ākonga katoa o te Tau 8 me eke, me hipa atu rānei i Ngā Paerewa ā-Motu, me Manawa Toa, Manawa Ora rānei i roto i Ngā Whanaketanga Rumaki Māori, mō te pāngarau me te tuhituhi i mua o te tau 2021.

Nā te whakatakoto whāinga i ngā wāhanga pēnei i te NCEA Taumata 2 i āwhina ki te hāpai i ngā paetae o ngā ākonga me te mahinga o te pūnaha. Ka āwhina ngā whāinga mō Ngā Paerewa ā-Motu o te pāngarau me te tuhituhi ki te arotahi mai i ngā whakaaro ki te hāpai ake i ngā paetae i roto i ēnei kaupapa. Mā te whakamahine i tā mātau arotahi ki te anga whakamua i taua wā anō ka whai mōhio mātau mō te tipu me ngā tatau o ngā akoranga, e āwhina ai kia pai ake ngā tautoko me te arotahi ki te whakaako me te ako.

Kei roto i tō mātau Kāhui Ako 197 ngā kura 1630, ngā ratonga mātauranga kōhungahunga 184 me ngā kaiwhakarato mātauranga tuatoru e whā, e whakakotahi ana i ā rātau rauemi, pūkenga hoki hei tautoko i ngā akoranga a ngā ākonga 551,000. Whakamahia ai e ngā Kāhui Ako ngā raraunga API hei hāpai i te mahinga ākonga i roto i ngā wāhi pēnei i te pāngarau, te reo matatini me te pūtaiao, te pānui me te tuhituhi, me ngā ākonga e mōrea ana ki te kore e puta. Kei te āwhina anō ngā raraunga PAI i ngā mātua me ngā whānau ki te tautoko i ngā ākonga ki te whai haere i ō rātau whāinga mātauranga, umanga mahi hoki.

Ngā Mea Whakaharahara: Ngā Mōhiohio Paetae Tūmatanui

  • 84.6%, 51,412 ākonga rānei e 18 tau, i whiwhi i te NCEA Taumata 2 i te 2016. He pikinga tēnei o te 10.3 ira ōrau mai i te tau 2011.
  • I piki te paetae NCEA Taumata 2 a ngā Māori 18 ngā tau mā te 17.2 ira ōrau i roto i tēnei wā rima tau. 
  • Kua tino piki rawa atu ngā tatau whai wāhi atu ki te mātauranga kōhungahunga (ECE). 96.7% o ngā tamariki i whai wāhi ki te ECE i mua i te tīmatanga i te kura i te tau atu ki te Hakihea 2016.

Ko Ngā Mōhiohio Paetae Tūmatanui 2016 (PAI) ka kitea i te paetukutuku Education Counts.

Last reviewed: Has this been useful? Give us your feedback