Mātaiako: He mōhiohio mā ngā Tumuaki

Ko tā Mātaiako he mātai, he aromatawai i te ako, he whakakao i ngā akoranga hei āwhina i te ākonga i te huarahi whai mātauranga.

Ko tāna anō: he kohikohi, he tātari kōrero mō te pakari haeretanga me te whakatutukitanga o te ākonga; ā, he whiriwhiri i aua kōrero e pai ake ai te whakaako me te ako.

He aha ngā kōrero me mōhio au?

  • I tēnei wā kei te waihangatia, kei te whakahāngaitia ngā pou aromatawai mō te reo me te pāngarau.
  • E wānangatia ana tētahi huarahi kia hāngai ki te aromatawai i te ako ā-ipurangi i roto i ngā kura me ngā whare rumaki Māori mā runga i te Puna Haokōrero Ākonga (SMS).
  • Me whaihua katoa ngā kaupapa whakangungu, whakapakari hoki mō te Māori – arā, te whakamana, te whakanui i te mātauranga Māori me aronui anō hoki ki te whakapapa, ki te reo, ki ngā tikanga tonu o te Māori.
  • Kei te whakahaeretia he kaupapa whakangungu mō Te Marautanga o Aotearoa me Ngā Whanaketanga Rumaki Māori hei tautoko i Mātaiako i roto i tō kura me ngā whare rumaki reo Māori.
  • Kei te mahi ngātahi Te Tāhuhu o te Mātauranga me ngā kaiarataki kura rumaki Māori me te hunga mātatau ki te aromatawai ki te whakatau i te tauākī a Te Tāhuhu mō te aromatawai i roto i ngā kura me ngā whare rumaki Māori hei ārahi i ngā kaupapa here me ngā mahi whakaako.

Hei aha tēnei māku?

  • He tino kaupapa a Mātaiako iāianei – he mea nui kia mōhio, kia mārama te hapori o tō kura e pēhea ana te ako o ā koutou tamariki kia taea ai e koutou te huarahi ako te whakarite ngātahi hei whai mā rātou.
  • He kaupapa nui a Mātaiako i a koe e whakatinana ana i Ngā Whanaketanga Rumaki Māori i tēnei tau i raro i te maru o Te Marautanga o Aotearoa, nō reira he mea nui anō kia mōhio, kia mārama hoki tō kura ki Mātaiako.
  • Tēnā pea ka pīrangi āwhina ētahi o ngā whānau o tō hapori mō Mātaiako kia mōhio ai rātou me pēhea tōna tautoko i ā rātou tamariki i roto i ā rātou mahi ako.

Me aha au ināianei?

  • Me mahi tahi koe me āu nā kaiako, me ngā whānau ki te whakarite i te matatau me te kaha o tō kura ki te aromatawai.
  • Akiaki atu i ngā kaiako ki te kōrero ki ngā whānau mō Mātaiako, kia mārama ai rātou ki ngā whakaritenga me te take hoki e aromatawaitia ai ā rātou tamariki i te kura.

Kei hea he kōrero anō māku?

Whakapā atu ki Te Ratonga Tautoko Kura o tō rohe ki te pīrangi koe ki te uru atu ki tētahi kaupapa whakangungu mō Te Marautanga o Aotearoa me Ngā Whanaketanga Rumaki Māori – inā ngā whakapānga:

Te Ratonga Tautoko Kura

Ngā tari ā-rohe

Last reviewed: Has this been useful? Give us your feedback