Mātaiako: He mōhiohio mā ngā poari kaitiaki

Ko tā Mātaiako he mātai, he aromatawai i te ako, he whakakao i ngā akoranga hei āwhina i te ākonga i te huarahi whai mātauranga.

Ko tāna anō: he kohikohi, he tātari kōrero mō te pakari haeretanga me te whakatutukitanga o te ākonga; ā, he whiriwhiri i aua kōrero e pai ake ai te whakaako me te ako.

He aha ngā kōrero me mōhio au?

  • I tēnei tau 2011, ka riro mā ngā kura me ngā whare rumaki reo Māori e whai ana i Te Marautanga o Aotearoa e whakatinana Ngā Whanaketanga Rumaki Māori.
  • Kua whakahoungia Ngā Aratohu Whakahaere Kura ā-Motu (NAGs) hei tautoko i te whakatinanatanga o Ngā Whanaketanga Rumaki Māori – kei ngā whakarerekētanga nei ko ngā mahi hou mā ngā poari kaitiaki.
  • I tēnei tau 2011, ka tīmata ngā poari kaitiaki ki te whakarite i ā rātou Tūtohinga mō te tau 2012 me ngā whāinga e hāngai ana ki Ngā Whanaketanga Rumaki Reo Māori.
  • Ā te tau 2012, ka whai wāhi ngā poari kaitiaki ki te whakatutuki i ā rātou whāinga.
  • Ā te tau 2013, me whakauru e ngā poari kaitiaki he raraunga kōeke ā-kura ki ā rātou pūrongo ā-tau, hei whakaatu i te tokomaha o ngā ākonga me te ōrautanga e angitu ana, ki runga, ki raro, ki raro rā anō i tā Ngā Whanaketanga Rumaki Māori e kī ai.
  • Me tuku, kia kaua e iti iho i te rua, he pūrongo whai reo māmā ki ngā mātua ki te whakamōhio atu e pēhea ana te ako a ngā ākonga ki tā Ngā Whanaketanga Rumaki Māori e kī ai.
  • E mahi tahi ana Te Tāhuhu o te Mātauranga me ngā kaiarataki rumaki Māori me ngā tohunga aromatawai ki te whakatau he aha te tauākī a Te Tāhuhu mō te aromatawai i roto i ngā kura me ngā whare rumaki reo Māori hei ārahi i ngā kaupapa here me ngā mahi whakaako.

Hei aha tēnei māku?

  • He kaupapa nui a Mātaiako i a koe e whakatinana ana i Ngā Whanaketanga Rumaki Māori, nō konei he mea nui hoki kia piki te mōhiotanga me te māramatanga o tō kura ki Mātaiako.
  • Tōna tikanga me whakarite e tō kura he tikanga kohi kōrero e whakaatu ana e pēhea ana te ako a ngā ākonga kia tika ai te whakamahere i te mahi whakaako me ngā akoranga hei whai mā rātou – he mea nui tēnei mā tō poari, me tō kura hei whakatutuki i ngā tikanga hou.

Me aha au ināianei?

  • Mahi tahi koutou ko ō hoa poari, kaiarataki kura, kaiako, whānau hoki ki te tohu i te āhei me te kaha o tō kura ki te aromatawai.
  • Me akiaki ngā kaimahi kura ki te kōrero ki ngā whānau mō Mātaiako e mārama ai rātou ki ngā whakaritenga aromatawai, ki te take hoki e aromatawaihia ana ā rātou tamariki i te kura.

Hei hea he kōrero anō māku?

Whakapā atu ki te tari ā-rohe ki te pīrangi koe ki te uru atu ki tētahi kaupapa whakangungu mā ngā poari kaitiaki mō Te Marautanga o Aotearoa me Ngā Whanaketanga Rumaki Māori.

Ngā tari ā-rohe

Last reviewed: Has this been useful? Give us your feedback