Mātaiako: He kōrero mā ngā whānau

Ko tā Mātaiako he mātai, he aromatawai i te ako, he whakakao i ngā akoranga hei āwhina i te ākonga i te huarahi whai mātauranga
Ka whakatinanahia Ngā Whanaketanga Rumaki Māori i te tau nei i ngā kura me ngā whare rumaki reo Māori e whai ana i Te Marautanga o Aotearoa.

Ko tā Ngā Whanaketanga Rumaki Māori he whakaahua i ngā pūkenga reo, pāngarau hoki, me te mārama o ngā tamariki me ako e rātou i tēnā kōeke, i tēnā kōeke i te kura. Ko te whakapiki i te angitu o te ākonga i roto i te reo me te pāngarau mā ngā wāhanga ako katoa o Te Marautanga o Aotearoa tētahi tino whāinga a ngā kura me ngā whare rumaki reo Māori.

He mea tautoko Ngā Whanaketanga Rumaki Māori e Mātaiako, nā reira he mea nui tonu kia mōhio, kia mārama hoki koe ki te kaupapa o Mātaiako.

He aha koia a Mātaiako?

Ko te kaupapa o Mātaiako kia mōhio ai koe e pēhea ana te ako a tō tamaiti, ā, me pehea te āwhina i a ia kia pakari kē atu tana ako.

Ko tā Mātaiako:

  • he kohikohi kōrero mō te pakari haeretanga me te whakatutukitanga o tō tamaiti;
  • kia mārama ki aua kōrero mō te ako a tō tamaiti
  • he whiriwhiri i aua kōrero e pai ake ai te whakaako me te ako a tō tamaiti.

Ngā whakatau whānui a te kaiako

He panga honohono...

Ānō nei he tūhonohono maramara o tētahi panga te whakatau whānui a te kaiako: ko tāna he kohikohi, he tātari kōrero mō ngā ako a te ākonga, ā, ka whakakao mai ngā kōrero katoa kia oti mai he tirohanga whānui o te pakari haeretanga me te whakatutukitanga o te ākonga

He maha ngā wāhanga o te tirohanga whānui, pērā me te panga maramara,– kāore e taea e tētahi maramara panga kotahi te tirohanga whānui te whakakite, inā hoki e kore e taea e tētahi maramara raraunga kotahi te tohu tika te pakari o te ākonga

Te tūhonohono maramara...

He maha ngā huarahi hei kohikohi kōrero mō te pakari haeretanga o tō tamaiti. Tērā pea ko tā te kaiako;

  • he mātakitaki i ngā whiriwhiringa mahi, tākaro hoki a tō tamaiti i te kura
  • he tuku i tō tamaiti ki te aromatawai i āna ake mahi, te mahi rānei a ētahi atu ākonga
  • he whakawhānui i ngā mahi e hoatu ai ki tō tāmaiti
  • he kōrero tahi me tō tamaiti e kitea ai ngā mea e mōhiotia ana, e mārama ana, ā, e taea hoki e ia te kawe
  • he whakaemi hua i ngā aromatawai ōkawa, he whakamahi rauemi aromatawai hoki

Hui katoa ana ēnei kōrero, hui katoa ana te mārama ki ngā wāhi e kaha ana tō tamaiti, ki ngā wāhi hoki me kaha ake ia.

Kia mōhio mai koutou...

Me tuku e te kura, kia kaua e iti iho i te rua, he pūrongo whai reo māmā ki ngā mātua ki te whakamōhio atu e pēhea ana te ako a tō tamaiti ki tā Ngā Whanaketanga Rumaki Māori e kī ai. Mā ēnei pūrongo e mārama ai koe ki:

  • ngā wāhanga e tino pai ana te ako a tō tamaiti
  • ngā wāhanga me pakari ake ia
  • te momo āwhinatanga hei tautoko i tana ako
  • ngā akoranga hei whai māna ā muri atu.

Ki te kore koe e mārama ki ngā kōrero i roto i ngā pūrongo mō tō tamaiti, me kōrero ki te kaiako, ki ētahi atu mātua rānei. Me inoi atu rānei ki tō kura kia whakaritea he hui hei kōrero mō:

  • ngā momo kōrero hei whakauru atu ki roto i ngā pūrongo
  • te āhua o ngā kōrero i roto i ngā pūrongo me
  • te reo o ngā pūrongo.

Te awahina atu i to tamaiti me tana ako

Me ohu te mahi...

He tika me mahi tahi me tō tamaiti me ōna kaiako ki te tautoko i te ako a tō tamaiti. Mā te pūrongo o tō tamaiti, ka whai wāhi koutou ki te kōrerorero mō ēnei:

  • e pēhea ana te ako a tō tamaiti i te kura?
  • he aha āna mahi e tutuki pai ana i a ia?
  • he aha ngā mahi me whai āwhinatanga tō tamaiti?
  • he aha anō ngā tū akoranga hei whai māna?

Mā te kaiako e whakamārama he aha he mahi māu hei whakapakari ake i ngā akoranga o tō tamaiti i te kāinga.

Ki te kore koe e mōhio, pātai atu...

He mea nui kia mōhio, kia mārama koe ki Mātaiako. Me he pātai, he āwangawanga rānei āu e pā ana ki Mātaiako, me kōrero ki te kaiako o tō tamaiti. Māna e whakamārama atu he aha ngā kōrero e whiriwhirihia ana e ia ki te whakatau whānui māna mō te ako o tō tamaiti i te kura, ā, māna hoki ō pātai e whakautu.

Mō ētahi atu kōrero, whakapā atu ki ngā tari ā-rohe.

Last reviewed: Has this been useful? Give us your feedback